افلاک کے پردوں سے یہ جاری ہوا فرمان

اَفلاک کے پَردوں سے یہ جَاری ہوا فرمان
وَالْعَصْر ! خَسارے ہی خَسارے میں ہے اِنسان
اِحساسِ زبُوں حَالیٴِ تَدبیر و فِکَر كَر
لاغَر تِرے افکار ہیں ، تدبیر ہے بے جان
اَفلَاس کی آغوش میں رَہتی ہے بغَاوَت
مَحرُومی کی دَہلِیز پہ پلتا ہے یہ طُوفَان
حُب دَاری و خُوددَاری و بیدَاریٴِ جَمہُور
اَقوَام کی تَكمِيل میں لازم ہے یہ سَامان
مُحتاج جہاں والوں کی رہتی ہے ہَمیشہ
بُھوکا رہے جِس قَوم کا مزدُور یا دَہقان
دَرکَار ہَیں وِیرَان خُدا خَانوں کو پھر سے
سَجدے کوئی شَبِّیرؓ سے حَبشیؓ کی سی آذان
فِرعَون هو قارُون هو شدَّاد یا نِمرُود
طاقَت کے سَرابوں میں بَھٹَکتے ہوۓ نادَان
بے چَینی کے ماحَول میں رُک جاتی ہے تَخلیق
وحشَت کے عذابوں میں اُمَڈ آتا ہے ہِیجان
اِیمَان کو اِیقان کی اُس عَوج پہ لے جا
طاغُوت کے ہرکارے بھی رَه جَائیں پریشان
اَغیار کی تہذِیب و تَمدُّن کے ثنا گَر
اَسلَاف کی تارِیخِ درَخشاں کو بھی پہچان
بے زور ہَیں ، بد حال ہیں ، لاچار ہیں مُسلِم
ہِمَت کا ، حَمِیَّت کا ، ہے غَیرَت کا یہ فُقدَان
آئینِ خُدا داد کی ہر شِق کا تُو حافِظ
سینے میں تِرے صَدیُوں سے مَحفُوظ ہے قُرآن
خیرات میں پاۓ ہوۓ یاقُوت ہیں ذَرّے
مِحنَت سے کَمایا ہُوا خوشہ بھی ہے مَرجان
چُھپ جاتے ہیں پوشاکِ فقِیرانہ میں اکثَر
جو عَیب ، چُھپائیں نہ شَہنشاہُوں کے دامان
اَفکارِ طَرِیقَت جو شَرِیعَت سے ہوں مَحرُوم
رە جاتی ہے گُمراہی فقَط حَاصِلِ مِیزان
جِس سحرسےلَرزاں تھےکبھی قیصَروکِسریٰ
اُس طَلعَتِ تَاباں کے اَمیں خود کو تُو پہچان
شاهِد محمُود