کیا بتائیں عشق پر کیا کیا ستم ڈھائے گئے

کیا بتائیں عشق پر کیا کیا ستم ڈھائے گئے​

چار سو پرچم گریبانوں کے لہرائے گئے​

کتنے نالے ہوگئے گم قہقہوں کی گونج میں​

کتنے نغمے ہیں جو غم کی تال پر گائے گئے​

دوستوں کی دوستی نے بھی دئے ہیں کچھ فریب​

کچھ حسین دھوکے مگر دانستہ بھی کھائے گئے​

جعفر و صادق کی غداری بھی زندہ کی گئی​

قاسم و محمود کے قصے بھی دہرائے گئے​

غم تو یہ ہےکھل گیا اہل محبت کا بھرم​

اس کا کیا غم ہے کہ ہم کیوں دار تک لائے گئے​

کیا یہ کچھ کم ہے قیامت، چلتے چلتے تھک گئے​

اور چلے تھے جس جگہ سے ہم وہیں پائے گئے​

کس قدر شاداب چہرے کھا گئیں تاریکیاں​

کس قدر خورشید ابھرے اور گہنائے گئے​

سر دھنے جاتے رہے ہیں رقص بسمل دیکھ کر​

اشکبار آنکھوں کے آگے جام چھلکائے گئے​

ناخدا بدمست ظالم جام ٹکراتا رہا​

جب سفینے تند طوفانوں سے ٹکرائے گئے​

پہلے خود کانٹے بچھائے اہلِ دل کی راہ میں​

ہوگئے زخمی تو ان پر پھول برسائے گئے​

اس کی محفل اجنبی خود وہ بھی ہے اب اجنبی​

جس کی محفل میں ہزاروں بار ہم آئے گئے​

عشق آوارہ نگاہی، حسن تسکینِ ہوس​

آہ کن لفظوں کو کیا مفہوم پہنائے گئے​

کون کہہ سکتا ہے میں ہوں رازدارِ زندگی​

کاکل اسرار فطرت کیسے سلجھائے گئے​

غم تو ہے کیفی ہماری زندگی کے ساتھ ساتھ​

ہم جہاں پہنچے وہیں تک کرب کے سائے گئے

زکی کیفی ​