ہم کیوں یہ مبتلائے بے تابی نظر ہیں

ہم کیوں یہ مبتلائے بے تابیِ نظر ہیں​

تسکینِ دل کی یا رب وہ صورتیں کدھر ہیں​

​

ذرّے جو گُل بنے تھے وہ بن گئے بگولے​

جو زینتِ چمن تھے وہ خاکِ رہ گزر ہیں​

​

دُنیا کی کیا حقیقت اور ہم سے کیا تعلق​

وہ کیا ہے اک جھلک ہے ہم کیا ہیں اک نظر ہیں​

​

ہم نے سُنے بہت کچھ قصّے جہانِ فانی​

افسانہ گو غضب ہیں قصّے تو مختصر ہیں​

​

غم خانۂ جہاں میں وُقعت ہی کیا ہماری​

اک نا شُنیدہ اُف ہیں، اک آہِ بے اثر ہیں​

اکبر الٰہ آبادی​