جس سے پڑتی ہو کسی جبہ توقیر پہ خاک

جس سے پڑتی ہو کسی جبۂ توقیر پہ خاک
ایسی جاگیر پہ اور صاحبِ جاگیر پہ خاک
چاہے میں ساتویں در میں بھی چھپا کر رکھوں
جم ہی جاتی ہے مری جاں تری تصویر پہ خاک

مجھ کو نسبت کے شرف نے یہ کیا ہے تعلیم
خاک اس پر جو کہے حلقۂ زنجیر پہ خاک
مرزا نوشہ سے کہا ہے کہ معافی دلوائیں
میں خاکم بدہن کہتا رہا میر پہ خاک
اس کی آواز پہ میں دیر سے پہنچا تابشؔ
ایسی تاخیر پہ اور باعثِ تاخیر پہ خاک

عباس تابش