گلاب پر اشعار ، گلاب کے پھول پر اشعار

دیکھ لیتا ہے تو کھلتے چلے جاتے ہیں گلاب
میری مٹی کو خوش آثار کیا ہے اس نے
عرفان صدیقی
۔۔۔۔۔۔

گلاب ٹہنی سے ٹوٹا زمین پر نہ گرا
کرشمے تیز ہوا کے سمجھ سے باہر ہیں
شہریار
۔۔۔۔۔۔

سنو کہ اب ہم گلاب دیں گے گلاب لیں گے
محبتوں میں کوئی خسارہ نہیں چلے گا
جاوید انور
۔۔۔۔۔۔۔

میں چاہتا تھا کہ اس کو گلاب پیش کروں
وہ خود گلاب تھا اس کو گلاب کیا دیتا
افضل الہ آبادی
۔۔۔۔۔۔۔

وہ خار خار ہے شاخ گلاب کی مانند
میں زخم زخم ہوں پھر بھی گلے لگاؤں اسے
احمد فراز
۔۔۔۔۔۔۔

نکل گلاب کی مٹھی سے اور خوشبو بن
میں بھاگتا ہوں ترے پیچھے اور تو جگنو بن
جاوید انور
۔۔۔۔۔۔

نئے دور کے نئے خواب ہیں نئے موسموں کے گلاب ہیں
یہ محبتوں کے چراغ ہیں انہیں نفرتوں کی ہوا نہ دے
بشیر بدر
۔۔۔۔۔۔۔۔

عرق نہیں ترے رو سے گلاب ٹپکے ہے
عجب یہ بات ہے شعلے سے آب ٹپکے ہے
نامعلوم
۔۔۔۔۔۔۔

مجھ کو بھی پہلے پہل اچھے لگے تھے یہ گلاب
ٹہنیاں جھکتی ہوئیں اور تتلیاں اڑتی ہوئیں
نعمان شوق
۔۔۔۔۔۔

بھری بہار میں اک شاخ پر کھلا ہے گلاب
کہ جیسے تو نے ہتھیلی پہ گال رکھا ہے
احمد فراز
۔۔۔۔۔۔

ستارہ آنکھ میں دل میں گلاب کیا رکھنا
کہ ڈھلتی عمر میں رنگ شباب کیا رکھنا
اکرم محمود
۔۔۔۔۔۔۔

گلدان میں گلاب کی کلیاں مہک اٹھیں
کرسی نے اس کو دیکھ کے آغوش وا کیا
محمد علوی
۔۔۔۔۔۔۔

وہ جس کے صحن میں کوئی گلاب کھل نہ سکا
تمام شہر کے بچوں سے پیار کرتا تھا
اظہر عنایتی
۔۔۔۔۔۔

حسرت موسم گلاب ہوں میں
سچ نہ ہو پائے گا وہ خواب ہوں میں
نینا سحر
۔۔۔۔۔۔

گہرے سرخ گلاب کا اندھا بلبل سانپ کو کیا دیکھے گا
پاس ہی اگتی ناگ پھنی تھی سارے پھول وہیں ملتے ہیں
عزیز حامد مدنی
۔۔۔۔۔۔۔

کہاں چراغ جلائیں کہاں گلاب رکھیں
چھتیں تو ملتی ہیں لیکن مکاں نہیں ملتا
ندا فاضلی
۔۔۔۔۔۔

ایک میں نے ہی اگائے نہیں خوابوں کے گلاب
تو بھی اس جرم میں شامل ہے مرا ساتھ نہ چھوڑ
مظہر امام
۔۔۔۔۔۔۔

یہ بزرگوں کی روا داری کے پژمردہ گلاب
آبیاری چاہتے ہیں ان میں چنگاری نہ رکھ
حامد مختار حامد
۔۔۔۔۔۔

رنگت اس رخ کی گل نے پائی ہے
اور پسینے کی بو گلاب میں ہے
سخی لکھنوی
۔۔۔۔۔۔

تو چھوڑ اب تو اسیر قفس کو اے صیاد
کلی چٹکنے لگی موسم گلاب آیا
مصحفی غلام ہمدانی