طالب نئیں مہر و مشتری کا
طالب نئیں مہر و مشتری کا
دیوانہ ہوا جو تجھ پری کا
یو غمزۂ شوخ ساحری میں
استاد ہے سحرِ سامری کا
تجھ تل سوں اے آفتاب طلعت
ممنون ہوں ذرّہ پروری کا
کفار فرنگ کوں دیا ہے
تجھ زلف نے درس کافری کا
تیرا خط خضر رنگ اے شوخ
سلطان ہے خشکی و تری کا
توں سر سوں قدم تلک جھلک میں
گویا ہے قصیدہ انوری کا
خورشید ستی ہوا ہے ہم سر
چیرا، ترے سر اُپر، زری کا
اے غنچہ نہ کر تو فخر، یو دل
ہے بند پیا کی بکتری کا
پایا ہے جو کوئی دولت فقر
مشتاق نئیں سکندری کا
پھیکی لگے اس کوں شان دولت
چاکھیا جو مزہ قلندری کا
کہتا ہے ولیؔ پکار یو بات
بندہ ہوں پیا کی دلبری کا
ولی دکنی
Comments
Post a Comment