نام سے جس کے دل کو حرارت ملے
نام سے جس کے دل کو حرارت ملے
رات کو چاندنی کی عبارت ملے
ہر قدم پر چمکتی بشارت ملے
کون ہے؟ کون ہے؟ وہ تمہارے سوا
مصطفےٰ ﷺ ، مصطفےٰ ﷺ ، مصطفےٰ ﷺ ، مصطفےٰﷺ
جس نے پیغامِ مہر و مروت دیا
درسِ انصاف و دینِ اخوت دیا
آدمی کو نمِ آدمیت دیا
کون ہے؟ کون ہے؟ وہ تمہارے سوا
مصطفےٰ ﷺ ، مصطفےٰ ﷺ ، مصطفےٰ ﷺ ، مصطفےٰﷺ
جس نے تاریکیوں میں اُجالا کیا
بے نواوں کو توقیر والا کیا
جس نے انسان کا بول بالا کیا
کون ہے؟ کون ہے؟ وہ تمہارے سوا
مصطفےٰ ﷺ ، مصطفےٰ ﷺ ، مصطفےٰ ﷺ ، مصطفےٰﷺ
کون ہر دور کا فیصلہ دے گیا
مدعا دے گیا ، حوصلہ دے گیا
ہر زمانے کو روشن دِیا دے گیا
کون ہے؟ کون ہے؟ وہ تمہارے سوا
مصطفےٰ ﷺ ، مصطفےٰ ﷺ ، مصطفےٰ ﷺ ، مصطفےٰﷺ
کس نے لمحات میں چاندنی گھول دی
زندگی عدل میزان پر تول دی
بند صدیوں کی زنجیرِ دَر کھول دی
کون ہے؟ کون ہے؟ وہ تمہارے سوا
مصطفےٰ ﷺ ، مصطفےٰ ﷺ ، مصطفےٰ ﷺ ، مصطفےٰﷺ
سید ضمیر جعفری
Comments
Post a Comment