ہے ثبت تری ذات سے تاریخ بشر میں

ہے ثبت تری ذات سے تاریخ ِ بشر میں
وہ عزم جو تھکتا نہیں طائف کے سفر میں
تو نور ِ ازل تاب سر ِ مطع ِ تخلیق
فیضان ِ ضیا تجھ سے ہے دامان ِ سحر میں
خورشید کے کاسے میں عطا تیری ضیا کی
خیرات ترے نور کی کشکول ِ قمر میں
تو سارے جہانوں کے لئے مژدۂ رحمت
احوال زمانوں کے سبھی تیری نظر میں
درپیش ہے بے سمت مسافت کی اذیت
اس دور کا انسان ہے دانش کے بھنور میں
حیراں ہے تری شان ِ توکل پہ زمانہ
چولھا بھی نہ جلتا تھا مہینوں ترے گھر میں
اشکوں کو زمیں پر بھی میں گرنے نہیں دیتا
سرمایہ تری یاد کا ہے دیدۂ تر میں
انور میرے دیوان میں ہے نعت ِ پیمبر
کیا توشۂ عقبٰی ہے مرے رخت ِ سفر میں
انور مسعود