تم اچھا ہی کیا مجھ سے کنارہ کرکے, راحت اندوری

تیری ہر بات محبت میں گوارا کر کے 

دل کے بازار میں بیٹھے ہیں خسارہ کر کے

ایک چنگاری نظر آئی تھی بستی میں اسے

وہ الگ ہٹ گیا آندھی کو اشارہ کر کے

آسمانوں کی طرف پھینک دیا ہے میں نے

چند مٹی کے چراغوں کو ستارہ کر کے

میں وہ دریا ہوں کہ ہر بوند بھنور ہے جس کی

تم نے اچھا ہی کیا مجھ سے کنارہ کر کے

منتظر ہوں کہ ستاروں کی ذرا آنکھ لگے

چاند کو چھت پر بلا لوں گا اشارہ کر کے