منیر نیازی کے چند منتخب اشعار

جانتا ہوں ایک ایسے شخص کو میں بھی منیر

غم سے پتھر ہو گیا لیکن کبھی رویا نہیں

-----------------------------------------------

مکان، زر، لبِ گویا، حدِ سپہر و زمیں

دکھائی دیتا ہے سب کچھ یہاں خدا کے سوا

-----------------------------------

آواز دے کے دیکھ لو شاید وہ مل ہی جائے

ورنہ یہ عمر بھر کا سفر رائگاں تو ہے

---------------------------------------

مجھ سے بہت قریب ہے تو پھر بھی اے منیر

پردہ سا کوئی میرے ترے درمیاں تو ہے

--------------------------------------------

وہ جو اس جہاں سے گزر گئے کسی اور شہر میں زندہ ہیں

کوئی ایسا شہر ضرور ہے انہی دوستوں سے بھرا ہوا

-----------------------------------------------------

زمیں کے گرد بھی پانی، زمیں کی تہہ میں بھی

یہ شہر جم کے کھڑا ہے جو تیرتا ہی نہ ہو

-----------------------------------

اک اور دریا کا سامنا تھا منیر مجھ کو

میں ایک دریا کے پار اترا تو میں نے دیکھا

--------------------------------------

ڈر کے کسی سے چھپ جاتا ہے جیسے سانپ خزانے میں

زر کے زور سے زندہ ہیں سب خاک کے اس ویرانے میں

----------------------------------------------------

مہک عجب سی ہو گئی پڑے پڑے صندوق میں

رنگت پھیکی پڑ گئی ریشم کے رومال کی

----------------------------------------------

رہتے ہیں آج جس میں، جسے دیکھتے ہیں ہم

ممکن ہے یہ گذشتہ کا خواب و خیال ہو٭

----------------------------------------------

میں تو منیر آئینے میں خود کو تک کر حیران ہوا

یہ چہرہ کچھ اور طرح تھا پہلے کسی زمانے میں

------------------------------------------------

ہے مسکنِ خوباں کہ کوئی عالمِ ہو ہے

موجود ہے کیا سایہ دیوار سے آگے

-----------------------------------------------

شہر، پربت، بحر و بر کو چھوڑتا جاتا ہوں میں

اک تماشا ہو رہا ہے، دیکھتا جاتا ہوں میں

---------------------------------------------

شوق ہیں کچھ جن کے پیچھے چل رہا ہوں میں منیر

رنج ہیں کچھ دل میں میرے، کھینچتا جاتا ہوں میں

-----------------------------------------

یہ سفر معلوم کا معلوم تک ہے اے منیر

میں کہاں تک حدوں کے قید خانوں میں رہوں