اب نہ وہ احباب زندہ ہیں نہ رسم الخط وہاں

اب نہ وہ احباب زندہ ہیں نہ رسم الخط وہاں 

روٹھ کر اردو تو دہلی سے دکن میں آ گئی 

اس کے چہرے کا مجھے مردانہ پن اچھا لگا 

چاشنی نمکین سی سارے بدن میں آ گئی 

کیوں سپیرا پن ترے نینوں میں پیدا ہو گیا 

اس قدر شوخی کدھر سے بانکپن میں آ گئی 

ایک بوسہ ہونٹ پر پھیلا تبسم بن گیا 

جو حرارت تھی مری اس کے بدن میں آ گئی 

ایک وحشی صنف سے ہم نے شرافت سیکھ لی 

پنج تن کی لو غزل کی انجمن میں آ گئی 

خلد کی تصویر کاوشؔ ہو بہو کشمیر تھی 

لاش اس کی پیرہن سے خود کفن میں آ گئی

کاوش بدری