تہذیب بے نقاب کی آنکھیں نکال دو
تہذیبِ بے نقاب کی آنکھیں نکال دو
اس قوم کے شباب کی آنکھیں نکال دو
جس نے سماعتوں کو دیا درسِ بے خودی
اس نغمۂ رُباب کی آنکھیں نکال دو
جس میں نہ ہو بصیرتِ انساں کی چاندنی
اب شیشۂ شراب کی آنکھیں نکال دو
اب منزلِ وفا کی ضرورت نہیں رہی
ہر عزمِ کامیاب کی آنکھیں نکال دو
ساغرؔ نکھر سکے نہ جہاں نکہتِ خودی
اس قریۂ گلاب کی آنکھیں نکال دو
ساغرؔ صدیقی
Comments
Post a Comment