دیکھا ہے جن نے تیرے رخسار کا تماشا
دیکھا ہے جن نے تیرے رخسار کا تماشا
نئیں دیکھتا سُرج کی جھلکار کا تماشا
اے رشک باغ جنت جب سوں جدا ہوا توں
دوزخ ہے مجھ کوں تب سوں گلزار کا تماشا
بے قصد مجھ زباں پر آتا ہے لفظ تمکیں
دیکھا ہے جب سوں تیری رفتار کا تماشا
رشتے کو بندگی کے ڈالا اَپس گلے میں
دیکھا جو تجھ صنم کے زنار کا تماشا
نرگس نمن رہی نئیں پل مارنے کی طاقت
آ دیکھ اپس انکھیاں کے بیمار کا تماشا
اس مکھ کا رنگ اڑکر قوسِ قزح کوں پہنچا
دیکھا جو تجھ بھواں کی تردار کا تماشا
تب سوں ولیؔ کا مطلب جا بیچ میں پڑیا ہے
دیکھا ہے جب سوں تیری دستار کا تماشا
ولی دکنی
Comments
Post a Comment