یہ جھاڑیاں یہ خار کہاں آ گیا ہوں میں

یہ جھاڑیاں، یہ خار، کہاں آ گیا ھُوں میں
اے حُکمِ شہریار! کہاں آ گیا ھُوں میں
ھر عندلیب مَرگِ تبسّم پہ نوحہ خواں
ھر پُھول سوگوار، کہاں آ گیا ھُوں میں
کیا واقعی نہیں ھے یہ موسیقیوں کا شہر
کیوں چُپ ھیں نغمہ کار، کہاں آ گیا ھُوں میں
پُھولوں کی سرزمیں ھے نہ خوُشبو کی رہ گزر
اے حسرتِ بہار، کہاں آ گیا ھُوں میں
جا تو رھا تھا چشمہء آبِ حیات پر
یہ دُھول، یہ غُبار، کہاں آ گیا ھُوں میں
رَہ زَن مُجھی سے پُوچھ رھے ھیں مِرا پتہ
اے حُسنِ اعتبار، کہاں آ گیا ھُوں میں

شکیب جلالی