اس کو نہ چھو سکے کبھی رنج و بلا کے ہاتھ

اس کو نہ چھو سکے کبھی رنج و بلا کے ہاتھ
اٹھے ہیں جس کے حق میں رسولِ خدا ﷺکے ہاتھ

بھیجا گیا ہے دین رسولِ خداﷺ کے ہاتھ
ایسا چراغ، دُور ہیں جس سے ہوا کے ہاتھ

دیکھوں گا جب بھی روضہ ء اقدس کی جالیاں
چُوموں گا فرطِ شوق سے پیہم لگا کے ہاتھ

گیسوئے مصطفی ﷺ سے یقینا ہوئی ہے مس
خوشبو کہاں سے آئی یہ بادِ صبا کے ہاتھ

خاطر میں کب وہ لائے گا شاہانِ وقت کو
اُٹھتے ہوں صرف اُن کی طرف جس گدا کے ہاتھ

محشر میں مجھ پہ سایہ ء لطفِ رسول ﷺ ہو
میں یہ دعائیں مانگ رہا ہوں اُٹھا کے ہاتھ

ممکن نہ تھا کہ روضہ ء اقدس کو چُھو سکیں
آگے بڑھا دیا ہے نظر کو بنا کے ہاتھ

بے حد و بے شمار خطائیں سہی ، مگر
کچھ غم نہیں کہ لاج ہے اب مصطفی ﷺ کے ہاتھ

ہم عاصیوں کے آپﷺ ہی تو دستگیرہیں
ہم سب کا آسرا ہیں شہ ِ انبیاء ﷺ کے ہاتھ

اخیار کی دُعا کا وسیلہ تلاش کر
عرشِ بریں سے دُور نہیں اولیا کے ہاتھ

میں ہوں گدائے کوچہ ء آلِ نبی نصیر
دیکھے تو مجھ کو نارِ جہنم لگا کے ہاتھ

سید نصیر الدین نصیر