حرم کی مقدس فضاؤں میں گم ہوں

حَرم کی مقدس فضاؤں میں گم ھُوں
میں جنت کی ٹھنڈی ھواؤں میں گم ھُوں

میں بیگانہ ھو کر ھر اِک ماسوا سے
بس اِک آشنا کی وفاؤں میں گم ھُوں

زبانیں جہاں گنگ ھیں ، اور لفظ ششدر
تحیّر کی ایسی فضاؤں میں گم ھُوں

میں کعبے کے بے آب و رنگ پتھروں سے
کرم کی اُمڈتی گھٹاؤں میں گم ھُوں

کبھی سنگِ اَسود کی کرنوں سے حیراں
کبھی مُلتزم کی دعاؤں میں گم ھُوں

مقفل ھیں در ، لُٹ رھے ھیں خزانے
عطا کی نرالی اداؤں میں گم ھُوں

ھر اک دِل سے ظلمت کے دَل چھٹ رھے ھیں
غلافِ سیاہ کی ضیاؤں میں گم ھُوں

جو میرے گناھوں کو بھی دھو رھی ھے
میں رَحمت کی اُن انتہاؤں میں گم ھُوں

یہ میزابِ رحمت پہ پُر درد نالے
فلک سے برستی عطاؤں میں گم ھُوں

یہ زمزم کے چشمے ، یہ پیاسوں کے جمگھٹ
زمیں سے اُبلتی شفاؤں میں گم ھُوں

جو اس آستاں کے لگاتے ھیں پھیرے
میں ان کے جُنوں کی اداؤں میں گم ھُوں

کھڑے ھیں بھکاری تیرے در کو تھامے
میں اِن کی بلکتی صداؤں میں گم ھُوں

یہ سینے سے اُٹھتی ندامت کی آھیں
میں اُن دردِ دل کی دواؤں میں گم ھُوں

یہ کعبے کے درباں ، یہ نازوں کے پالے
میں اِن کی پیاری جفاؤں میں گم ھُوں

تصور میں یادوں کی محفل سجی ھے
تخیل کی دلکش خلاؤں میں گم ھُوں

ابھی شرحِ الفت کی منزل کہاں ھے
ابھی تو تقی ! ابتداؤں میں گم ھُوں

مولانا تقی عثمانی