اس کا نقشہ ایک بے ترتیب افسانے کا تھا

اُس کا نقشہ ایک بے ترتیب افسانے کا تھا

یہ تماشہ تھا یا کوئی خواب دیوانے کا تھا

سارے کرداروں میں بے رشتہ تعلق تھا کوئی

ان کی بے ہوشی میں غم سا ہوش آ جانے کا تھا

عشق کیا ہم نے کیا آوارگی کے عہد میں

اک جتن بے چینیوں سے دل کو بہلانے کا تھا

خواہشیں ہیں گھر سے باہر دور جانے کی بہت

شوق لیکن دل میں واپس لوٹ کر آنے کا تھا

لے گیا دل جو اس محفل کی شب میں اے منیر

اس حسیں کا بزم میں انداز شرمانے کا تھا

منیر نیازی