کیسے انسان ہیں ہم ریڑھ کی ہڈی کے بغیر

کیسے اِنسان ھیں ھم ریڑھ کی ھڈّی کے بغیر

لیے پھرتی ھیں ھوائیں ھمیں مرضی کے بغیر

ٹھیک آتا نہیں مجھ پر کوئی دُنیا کا لِباس

آسماں والے مرے ناپ کے درزی کے بغیر

کوئی عَطّار دوا ھی نہیں دیتا ھم کو

اے طبیبِ مرضِ جاں! تری پرچی کے بغیر

مَیں وھی ھوں کہ بنا بیٹھا ھوں کہسارِ وجود

تُو نے بھیجا تھا جِسے فُرصتِ ھستی کے بغیر

اب تو گھر والے بھی اُس کے ھیں کچھ آزاد خیال

کیا نہیں آئے گی اب بھی وہ سہیلی کے بغیر

رنگِ خُوں کتنا بھی ھو رچتے نہیں ھونٹھ مرے

کُوچہءدِل! ترے نکڑ کی تمولی کے بغیر

بد نصیبوں کی قطاروں میں میاں تُم کیسے

دفترِ کاتبِ تقدیر میں عرضی کے بغیر

کوئی دِیوانگی پاتی نہیں صحرا کی سند

مُدّتوں شہر میں اب دشت نوردی کے بغیر

ساحلِ عشق سے آگے نہیں جانے کا بدن

پار کرنا ھے یہ دریا تمھیں کشتی کے بغیر

مجھ پہ کھلتا ھی نہیں حُسن مرے ھونے کا

اپنے آئینے سے اِک عکس کی چوری کے بغیر

حق بھی باطل سا نظر آتا ھے اِس محفل میں

کبھی نا وقت چلا جاﺅں جو مستی کے بغیر

نہ رھا دشت تو جینا مرا ناممکن ھے

زِندہ رھنا کوئی مُشکل نہیں بستی کے بغیر

ظُلم تیرے ، ترا اِک طرزِ محبت بھی تو تھا

خُوش رھوں کیسے بھلا مَیں تری سختی کے بغیر

فرحت احساس کوئی یونہی نہیں ھو جاتا

ارضِ تنہائی میں اِس تخت نشینی کے بغیر

فرحت احساس