دھیان میں آ کر بیٹھ گئے ہو تم بھی ناں

دھیان میں آ کر بیٹھ گئے ہو ، تم بھی ناں

مجھے مسلسل دیکھ رہے ہو ، تم بھی ناں

دے جاتے ہو مجھ کو کتنے رنگ نئے

جیسے پہلی بار ملے ہو ، تم بھی ناں

ہر منظر میں اب ہم دونوں ہوتے ہیں

مجھ میں ایسے آن بسے ہو ، تم بھی ناں

عشق نے یوں دونوں کو آمیز کیا

اب تو تم بھی کہھ دیتے ہو ، تم بھی ناں

خود ہی کہو اب کیسے سنور سکتی ہوں میں

آئینہ میں تم ہوتے ہو ، تم بھی ناں

بن کے حسین ہونٹوں پر بھی رہتے ہو

اشکوں میں بھی تم بہتے ہو ، تم بھی ناں

میری بند آنکھیں تم پڑھ لیتے ہو

مجھ کو اتنا جان چکے ہو ، تم بھی ناں

مانگ رہے ہو رخصت اور خود ہی

ہاتھ میں ہاتھ لئے بیٹھے ہو ، تم بھی ناں

عنبرین حسیب عنبر