بہت سی آنکھیں لگی ہیں اور ایک خواب تیار ہو رہا ہے

بہت سی آنکھیں لگی ھیں اور ایک خواب تیّار ھو رھا ھے

حقیقتوں سے مقابلے کا نصاب تیّار ھو رھا ھے

تمام دُنیا کے زخم اپنے بیاں قلم بند کر رھے ھیں

مری سوانحِ۔ حیات کا ایک باب تیّار ھو رھا ھے

بہت سے چاند اور پُھول ایک تجربے میں لگے ھیں کب سے

سُنا ھے تُم نے کہیں تُمھارا جواب تیّار ھو رھا ھے

چمن کے پُھولوں میں خُون دینے کی ایک تحریک چل رھی ھے

اور اِس لہو سے خزاں کی خاطر خضاب تیّار ھو رھا ھے

کُھلے ھوئے ھیں فنا کے دفتر میں سب عناصر کے گوشوارے

کہ آسمانوں میں اب زمیں کا حساب تیّار ھو رھا ھے

مَیں جب کبھی اُس سے پوچھتا ھوں کہ یار ، مرھم کہاں ھے میرا

تو وقت کہتا ھے مسکرا کر جناب تیّار ھو رھا ھے

بدن کو جانا ھے پہلی بار آج روح کی محفلِ طرب میں

تو ایسے لگتا ھے جیسے کوئی نواب تیّار ھو رھا ھے

اِس اِمتحاں کے سوال آتے نہیں نصابوں سے مکتبوں کے

عجیب عاشق ھے یہ جو پڑھ کر کتاب تیّار ھو رھا ھے

جنوں نے برپا کیا صحرا میں شہر کی تعزیت کا جلسہ

تو فرحت احساس بھی بہ چشمِ پُر آب تیّار ھو رھا ھے

فرحت احساس