کچھ اشارے تھے جنہیں دنیا سمجھ بیٹھے تھے ہم
کُچھ اِشارے تھے جِنہیں دُنیا سمجھ بیٹھے تھے ہم
اُس نِگاہِ آشنا کو کیا سمجھ بیٹھے تھے ہم
رفتہ رفتہ غیر اپنی ہی نظر میں ہو گئے
واہ ری غفلت تُجھے اپنا سمجھ بیٹھے تھے ہم
ہوش کی توفیق بھی کب اہلِ دِل کو ہوسکی
عِشق میں اپنے کو دیوانہ سمجھ بیٹھے تھے ہم
پردہِ آزردگی میں تھی وہ جانِ اِلتِفات
جِس ادا کو رنجشِ بے جا سمجھ بیٹھے تھے ہم
بے نیازی کو تِری پایا سراسر سوز و درد
تُجھ کو اِک دُنیا سے بیگانہ سمجھ بیٹھے تھے ہم
باتوں باتوں میں پیامِ مرگ بھی آ ہی گیا
اُن نِگاہوں کو حیات افزا سمجھ بیٹھے تھے ہم
رفتہ رفتہ عِشق مانُوسِ جہاں ہوتا چلا
خود کو تیرے ہِجر میں تنہا سمجھ بیٹھے تھے ہم
حُسن کو اِک حُسن ہی سمجھے نہیں اور اے فراقؔ
مہرباں نامہرباں کیا کیا سمجھ بیٹھے تھے ہم۔۔۔!
فراق گورکھپوری
Comments
Post a Comment