تو میرے روکھے پن پر تلملا نئیں

نذرِ جان ایلیا

تُو میرے رُوکھے پن پر تلملا نئیں
مَیں جتنا بے مروّت اب ہوں ، تھا نئیں

خوشی بےحد سُہانی کیفیت ہے
مگر غم سے زیادہ دیرپا نئیں

مِرے اشکوں کو مت بہلائیں، جائیں
یہ میرا مسئلہ ہے ، آپ کا نئیں

تو کیا تیرا نہیں ہے  تیرا مُنکر ؟
تو کیا تُو اپنے مُنکر کا خُدا نئیں ؟

چلو مانا نہیں جَون ایلیا مَیں
مگر تُو بھی تو کوئی فارھہ نئیں

“محبت ھوگئی” کہنا غلط ہے
محبت زندگی ہے ، واقعہ نئیں

مُجھے الزام مت دے، بنتِ حوّا !
مَیں آدم ہوں، فرشتہ نئیں، خُدا نئیں

یہی ہے  داستانِ وصلِ جاناں
کہ کچھ کچھ تو ہوا، کچھ کچھ ہوا نئیں

تکلّف چھوڑ فارس ! پاؤں پڑ جا
ابھی وہ جانے والا ہے ، گیا نئیں

رحمان فارس