استاد کی عظمت پر اشعار ، استاد پر شاعری

ادب تعلیم کا جوہر ہے زیور ہے جوانی کا
وہی شاگرد ہیں جو خدمت استاد کرتے ہیں

چکبست برج نرائن
۔۔۔۔۔۔۔
جن کے کردار سے آتی ہو صداقت کی مہک
ان کی تدریس سے پتھر بھی پگھل سکتے ہیں
نامعلوم
۔۔۔۔۔
ماں باپ اور استاد سب ہیں خدا کی رحمت
ہے روک ٹوک ان کی حق میں تمہارے نعمت

الطاف حسین حالی
۔۔۔۔۔۔۔
رہبر بھی یہ ہمدم بھی یہ غم خوار ہمارے
استاد یہ قوموں کے ہیں معمار ہمارے
نامعلوم
۔۔۔۔
وہی شاگرد پھر ہو جاتے ہیں استاد اے جوہرؔ
جو اپنے جان و دل سے خدمت استاد کرتے ہیں
لالا مادھو رام جوہر
۔۔۔۔۔۔۔

اپنے استادوں کو پایا ہم نے مشفق مہربان
حق نےنخشے ہیں انھیں اوصاف میر کارواں
نامعلوم
۔۔۔۔
تعلیم کو لکھیں گے اگر تاج محل ہم
اس پیکر تدریس کو محراب لکھیں گے
نامعلوم
۔۔

۔۔۔۔۔۔۔۔۔۔۔۔۔۔۔۔۔۔۔

تمھاری باتوں کی بھینی خوشبو 

ہماری سوچوں میں بس گئی ہے

تمھارے نقش قدم سے ہم نے 

ہزاروں اُجلے خیال پائے

تمھارا دستِ شفیق تھاما

تمھاری اُنگلی پکڑ کے خود کو 

سنبھال پائے

تمھاری آنکھوں کی روشنی سے

ہمارے دِل بھی ہوئے منور

تمھارے لفظوں کے سچے موتی 

ہمارے دامن میں بھر گئے ہیں

تمھارے دم سے یہ کھوٹے سکے 

چمک گئے ہیں

تمھارے دم سے یہ بگڑے نقشے 

سنور گئے ہیں

تمھارے دم سے 

یقیں کی دولت ہمیں ملی ہے

تمھارے دم سے 

ہمارے خوابوں میں جان آئی

تمھاری معصوم سی دعائیں 

ہماری راہ کا ہیں نور اب تک

تمھیں خدا نے کمال بخشا

تمھاری محنت عظیم تر ہے

تمھارا رُتبہ خُدا ہی جانے

تمھی سے سیکھا سوال کرنا

تمھارے بچے یہ پوچھتے ہیں

کہاں سے لائیں ہمیں بتاؤ 

وہ خواب لمحے گلاب یادیں

کہاں سے لائیں ہمیں بتاؤ 

وہ پھول باتیں عذاب یادیں

۔۔۔۔۔۔۔۔۔۔۔۔۔۔۔۔۔۔۔۔

عابی مکھنوی