عشق نعمت ہے کہ آزار نہيں جانتا ہوں

عشق نعمت ہے کہ آزار ، نہيں جانتا ہوں 

میں کسی چیز کو بےکار نہيں جانتا ہوں

اِتنا معلوم ہے اُس پار کوئی ہے میرا 

اور وہ کون ہے سرکار ! نہيں جانتا ہوں

کب یہاں جشن کا سامان کیا جائے ' اور 

کب چلے آئیں عزادار ' نہيں جانتا ہوں

بیچنے والے مجھے بیچ کے خوش ہیں ایسے 

جیسے میں قیمتِ بازار نہيں جانتا ہوں

تُو فُلاں ، اِبن ِ فلاں اِبنِ فلاں ہے ، ہو گا 

میں ترا نام و نسب یار ، نہيں جانتا ہوں

جانے کس وقت ملے کس کو رہائی ، عامی 

کون ہو جائے گرفتار نہيں جانتا ہوں

آج کے آج میسر ہوں تو پڑھ لے ، عامی 

کل ہو کیا سُرخیِ اخبار ، نہيں جانتا ہوں

عمران عامی