لفظ کوچے پر اشعار

دل اپنا کہیں ٹھہرے تو ہم بھی کہیں ٹھہریں
اس کوچے میں آ رہنا اس کوچے میں جا رہنا
نوح ناروی
لوگو! ہم پردیسی ہو کر جانے کیا کیا کھو بیٹھے
اپنے کوچے بھی لگتے ہیں بیگانے بیگانے سے
حمیرا رحمان
زندگی ہم ترے کوچے میں چلے آئے تو ہیں
تیرے کوچے کی ہوا ہم سے خفا لگتی ہے
معید رشیدی
ہر گلی کوچے میں رونے کی صدا میری ہے
شہر میں جو بھی ہوا ہے وہ خطا میری ہے
فرحت احساس
تیرے کوچے کی ہوا پوچھے ہے اب ہم سے
نام کیا ہے کیا نسب ہے ہم کہاں کے ہیں
اسلم محمود
پائے بوسی بھی تمہیں یار کی مل جائے گی
اس کے کوچے کی ذرا خاک تو مل جانے دو
نامعلوم
جو مسافر بھی ترے کوچے سے گزرا ہوگا
اپنی نظروں کو بھی دیوار سمجھتا ہوگا
حنیف اخگر
ہزار مرتبہ بہتر ہے بادشاہی سے
اگر نصیب ترے کوچے کی گدائی ہو
میر تقی میر
ہو سکے کیا اپنی وحشت کا علاج
میرے کوچے میں بھی صحرا چاہئے
داغؔ دہلوی
اک تیرے ہی کوچے پر موقوف نہیں ہے کچھ
ہر گام ہیں تعزیریں ہم لوگ جہاں بھی ہیں
اختر لکھنوی
ایسی آزردگی کیا تھی ہمیں اس کوچے سے
پھر نہ آنے کی جو ہم کھا کے قسم نکلے ہیں
مصحفی غلام ہمدانی
مٹی خراب ہے ترے کوچے میں ورنہ ہم
اب تک تو جس زمیں پہ رہے آسماں رہے
انور دہلوی
ہر کوچے میں ارمانوں کا خون ہوا
شہر کے جتنے رستے ہیں سب خونیں ہیں
بقا بلوچ
آیا نہ پھر کے ایک بھی کوچے سے یار کے
قاصد گیا نسیم گئی نامہ بر گیا
جلیل مانک پوری
نکلو بھی کبھی سود و زیاں سے ورنہ
کوچے میں ترے کون بھلا آئے گا
انجم اعظمی
ترے کوچے کی شاید راہ بھولی
صبا پھرتی ہے مضطر کو بہ کو آج
خواجہ محمد وزیر
کوچے میں اس کے بیٹھنا حسن کو اس کے دیکھنا
ہم تو اسی کو سمجھے ہیں باغ بھی اور بہار بھی
نظیر اکبرآبادی
ترے کوچے ہر بہانے مجھے دن سے رات کرنا
کبھی اس سے بات کرنا کبھی اس سے بات کرنا
مصحفی غلام ہمدانی
بادشاہت کے مزے ہیں خاکساری میں سلیمؔ
یہ نظارہ یار کے کوچے میں رہ کے دیکھنا
سردار سلیم
نسیم ہے ترے کوچے میں اور صبا بھی ہے
ہماری خاک سے دیکھو تو کچھ رہا بھی ہے
محمد رفیع سودا