عید آئی کہے سارا جہاں عید مبارک

عید آئی کہے سارا جہاں ، عید مبارَک
ہم مانیں گے جب تم کہو جاں ، عید مبارَک

یاروں کو تو فرصت ہی نہیں جشنِ طرب سے
سنتے وُہ بھلا میری کہاں ، عید مبارَک

دِل لے کے جنہیں بھول گئے آپ کبھی کا
کہتے ہیں وُہی سوختہ جاں ، عید مبارَک

مصروفِ تبسم جو رہا یار اُسی کو
کہتا رہا دِل گریہ کناں ، عید مبارَک

برسات نگاہوں کی اُتارے تیرا صدقہ
رِہ رِہ کے کہے گھر کی خزاں ، عید مبارَک

اُس موسمی مخلص کو جو دیکھو تو پرندو!۔
کہنا تمہیں کہتا تھا فلاں ، عید مبارَک

روتے نہیں تو دِل کا نشاں تک بھی نہ رہتا
یادوں سے وُہ اُٹھتا ہے دُھواں ، عید مبارَک

کہتا ہے جہاں آج تو دُشمن کو بھی تبریک
کیوں تجھ پہ ہیں دو لفظ گراں ، عید مبارَک

ہم تو تری آواز کو ترسے ہُوئے ہیں دوست
گو کہتا رہے سارا جہاں ، عید مبارَک

ویران مکاں کے کسی کونے میں دَبی قیس
ہچکی کا ہُوا وِردِ زَباں ، عید مبارَک

نوٹ : ہر شعر کے پہلے حرف کو ملانے سے ’’عید مبارک ہو‘‘ بنتا ہے۔

شہزاد قیس