بستیوں کو ترے دیوانے نے ویراں سمجھا

بستیوں کو تِرے دیوانے نے ویراں سمجھا
گُلشنِ دہر کو پُرہول بیاباں سمجھا
کُوچے کٹوا کے سرِ راہ گزر بیٹھا ہُوں
خاک اُڑانے سے مَیں اے قیس اسے آساں سمجھا
قیس و فرہاد سے پُوچھے کوئ اِیذاۓ فِراق
کوئ مُشکِل اس سمجھا کوئ آساں سمجھا
سخت جانوں کو کہاں چھوڑ چلا او قاتِل
تُو نے شاید کوئ دم کا ہمیں مہماں سمجھا
پِھر یہ سر ہوگا نہ یہ سجدہِ شوق او کافر
آج سے تُو نے اگر مُجھ کو مُسلماں سمجھا
کیا دِل آویز ہے نظارہِ خُونِ شُہدا
دامنِ یار کو مَیں صحنِ گُلستاں سمجھا
شاہدِ گُل پہ کبھی آنکھ نہ ڈالی مَیں نے
عارضی حُسن کو دو روز کا مہماں سمجھا
تھی بہرحال مُجھے خاطِرِ صیّاد عزیز
مَیں نے اِس کُنجِ قفس کو بھی گُلستاں سمجھا
کون سا راز ہے اِس خاک کے پُتلے سے نِہاں
لیکن اپنے خطِ قِسمت کو نہ اِنساں سمجھا
ہوش جاتے رہے ساقی اِنہِیں آنکھوں کی قسم
گردِش چشم کو مَیں گردِش دوراں سمجھا
آپ کو جِس نے محبّت کی نظر سے دیکھا
سِتم و لُطف کو ہر طرح وہ یکساں سمجھا
وعدہِ دِید کُجا اور دِل بےتاب کُجا
فقط اُمّید پہ کم بخت آساں سمجھا
دُھوپ میں تشنہِ دیدار کھڑے ہیں لاکھوں
کوچہِ یار کو مَیں حشر کا ساماں سمجھا
وہ زمانے کے حوادِث کا اثر کیوں لیتا
شادی و غم کو جو اِک خوابِ پریشاں سمجھا
زِندگی کشمکشِ رنج و محن میں گُزری
چار دیوارِ عناصر کو مَیں رِنداں سمجھا
یاسؔ اچھی نہیں گُستاخیِ دستِ وحشت
دامنِ یار کو کیا اپنا گریباں سمجھا۔۔۔!

یگانہ چنگیزی