آگ ، نظم احمد فراز

نظم "آگ"
احمد فراز
۔۔
مُفلسو! اپنے مقدّر سے شکایت نہ کرو
اس سے انسان کے ایمان میں فرق آتا ھے
ھم تو ناچیز سے بندے ھیں ھمیں کیا معلوم
کونسی بات میں کیا مصلحتِ یزداں ھے
کتنے گُمراہ و گنہگار ھوُئے جاتے ھیں
کیا کہا؟ "خانماں برباد ھوُئے جاتے ھیں
دَمبدم آگ کے بے رحم لپکتے شعلے
اپنے بوسیدہ مکان راکھ کیے دیتے ھیں
خاک ھی خاک ھوُئی جاتی ھے دُنیا اپنی
اور اس آتشِ و ظلمات کے سیلاب میں بھی
مَرمَر و آھن و سیماں کی عمارات بُلند
اُسی پندار اُسی شان سے استادہ ھیں
کیا خدا صرف غریبوں پہ سِتم ڈھاتا ھے"
ٹھیک کہتے ھو مگر خام عقائد والو
ھم تو تقدیر کے بندے ھیں ھمیں کیا معلوم
کونسی بات میں کیا مصلحتِ یزداں ھے
اور پھر اپنی شکایت سے بھی کیا ھوتا ھے
وھی ھوتا ھے جو منظورِ خدا ھوتا ھے