ملتا نہیں ہے گوہر نام و نشان خاک

ملتا نہیں ہے گوہر نام و نشان  خاک
مقدور بھر تو چھان چکا ہوں جہان  خاک

پھر مجھ کو دشت دشت پھراتی رہی ہوا
ایسا ہوا میں شامل  وابستگان  خاک

سب خاک ہے تو خاک کا ہونا فضول تھا
پھر خاک داں ميں کس لۓ کھولی دکان خاک

اٹھ جائيں تو فلک کو اٹھا کر پرے کریں
تیری نظر ميں خاک ہیں افتادگان خاک !

ہم کو نہ آسمان  تہ  خاک سے ڈرا
ہم لوگ تو ابھی سے ہیں آسودگان  خاک

ہم سے ہر ایک آن ہے اس کا مکالمہ
ہم خاک زادگاں سے سنو داستان خاک

یہ کائنات خواب ہے کہ وہ جہاں خیال
کچھ تو مجھے جواب دو اے خفتگان  خاک

ہم پر نہیں تو کس پہ کھلیں گے زمیں کے بھید
خاکی سے بڑھ کے کون ہوا رازدان  خاک

نقش  قدم حضورۖ کے یاں بھی وہاں بھی ہیں
اک خاک  آسمان ہے اک آسمان  خاک

لپٹا ہوا ہے آستاں سے جھلملیں غبار
اک نور نے لپیٹ دیا ارمغان خاک

نیّر نواۓ حرف تو مٹی کی چیخ تھی
پندار _ فن کی بات ہے گویا گمان  خاک
شہزاد نیر