وصال پر شاعری ، لفظ وصل پر شاعری

وہ مان گئے تو وصل کا ہو گا مزہ نصیب
دل کی گرہ کے ساتھ کھلے گا مرا نصیب
حسن رضا بریلوی
۔۔۔
آرزوئے وصل جاناں میں سحر ہونے لگی
زندگی مانند شمع مختصر ہونے لگی
عدم
۔۔۔۔

دو الگ لفظ نہیں ہجر و وصال
ایک میں ایک کی گویائی ہے

فرحت احساس
۔۔۔
دشمن کو لطفِ وصل، حسنؔ کو غمِ فراق
ہر شخص کا جدا ہے مقدر، جدا نصیب
حسن رضا بریلوی
 
۔۔۔۔۔۔
عشق پر فائز ہوں اوروں کی طرح لیکن مجھے
وصل کا لپکا نہیں ہے ہجر سے وحشت نہیں

غلام حسین ساجد

 
۔۔۔۔
عشق میں نسبت نہیں بلبل کو پروانے کے ساتھ
وصل میں وہ جان دے یہ ہجر میں جیتی رہے

جعفر علی خاں ذکی

۔۔۔۔
حکایت عشق سے بھی دل کا علاج ممکن نہیں کہ اب بھی
فراق کی تلخیاں وہی ہیں وصال کی آرزو وہی ہے

غلام حسین ساجد

 
۔۔۔۔
مری بہار میں عالم خزاں کا رہتا ہے
ہوا جو وصل تو کھٹکا رہا جدائی کا

جلیل مانک پوری

۔۔۔۔
وصل کی رات خوشی نے مجھے سونے نہ دیا
میں بھی بے دار رہا طالع بے دار کے ساتھ

جلیل مانک پوری

۔۔۔۔
وصال یار کی خواہش میں اکثر
چراغ شام سے پہلے جلا ہوں

عالم تاب تشنہ
 
۔۔۔۔۔
ٹھہری جو وصل کی تو ہوئی صبح شام سے
بت مہرباں ہوئے تو خدا مہرباں نہ تھا

لالہ مادھو رام جوہر
 
۔۔۔۔۔
وہ اور وعدہ وصل کا قاصد نہیں نہیں
سچ سچ بتا یہ لفظ انہی کی زباں کے ہیں

مفتی صدرالدین آزردہ

۔۔۔۔۔
میں اپنے جسم کی سرگوشیوں کو سنتا ہوں
ترے وصال کی ساعت نکلتی جاتی ہے

شہریار

 
۔۔۔۔۔
وعدہ کیا ہے غیر سے اور وہ بھی وصل کا
کلی کرو حضور ہوا ہے دہن خراب

احمد حسین مائل

۔۔۔۔۔
وصل کا گل نہ سہی ہجر کا کانٹا ہی سہی
کچھ نہ کچھ تو مری وحشت کا صلہ دے مجھ کو

مرغوب علی

 
۔۔۔۔۔
مرے سوال وصال پر تم نظر جھکا کر کھڑے ہوئے ہو
تمہیں بتاؤ یہ بات کیا ہے سوال پورا جواب آدھا

کنور مہیندر سنگھ بیدی سحر

  ۔۔۔۔
دھڑکتی قربتوں کے خواب سے جاگے تو جانا
ذرا سے وصل نے کتنا اکیلا کر دیا ہے

حسن عباس رضا

 
۔۔۔۔۔

ملا نہ لطف وصال لیکن مزے کا شب بھر رہا تماشا
ادھر کھلا بند اس قبا کا گرہ لگا دی ادھر حیا نے

جلیل مانک پوری
۔۔۔۔
وصل کی رات ہے بگڑو نہ برابر تو رہے
پھٹ گیا میرا گریبان تمہارا دامن

خواجہ محمد وزیر

۔۔۔۔
ترغیب گناہ لحظہ لحظہ
اب رات جوان ہو گئی ہے

فراق گورکھپوری
۔۔۔۔

۔۔۔۔۔
یہ آرزو بھی بڑی چیز ہے مگر ہم دم
وصال یار فقط آرزو کی بات نہیں

فیض احمد فیض

۔۔۔۔۔
جان لیوا تھیں خواہشیں ورنہ
وصل سے انتظار اچھا تھا

جون ایلیا

 
۔۔۔۔۔۔
بھلا ہم ملے بھی تو کیا ملے وہی دوریاں وہی فاصلے
نہ کبھی ہمارے قدم بڑھے نہ کبھی تمہاری جھجک گئی

بشیر بدر

 
۔۔۔۔۔۔۔
چند کلیاں نشاط کی چن کر مدتوں محو یاس رہتا ہوں
تیرا ملنا خوشی کی بات سہی تجھ سے مل کر اداس رہتا ہوں

ساحر لدھیانوی

۔۔۔۔۔۔
وصل کا دن اور اتنا مختصر
دن گنے جاتے تھے اس دن کے لیے

امیر مینائی

 
۔۔۔۔۔۔
شب وصال ہے گل کر دو ان چراغوں کو
خوشی کی بزم میں کیا کام جلنے والوں کا

داغؔ دہلوی

۔۔۔۔۔۔
سو چاند بھی چمکیں گے تو کیا بات بنے گی
تم آئے تو اس رات کی اوقات بنے گی

جاں نثاراختر

 
۔۔۔۔
آرزو وصل کی رکھتی ہے پریشاں کیا کیا
کیا بتاؤں کہ میرے دل میں ہے ارماں کیا کیا

اختر شیرانی

 
؟۔۔۔۔۔۔۔
ذرا وصال کے بعد آئنہ تو دیکھ اے دوست
ترے جمال کی دوشیزگی نکھر آئی

فراق گورکھپوری

۔۔۔۔۔۔۔
وصل ہو یا فراق ہو اکبرؔ
جاگنا رات بھر مصیبت ہے

اکبر الہ آبادی

۔۔۔۔۔۔۔۔
فرازؔ عشق کی دنیا تو خوبصورت تھی
یہ کس نے فتنۂ ہجر و وصال رکھا ہے

احمد فراز

 
۔۔۔۔۔۔۔۔
وصل میں رنگ اڑ گیا میرا
کیا جدائی کو منہ دکھاؤں گا

میر تقی میر

۔۔۔۔۔۔
پھر بیٹھے بیٹھے وعدۂ وصل اس نے کر لیا
پھر اٹھ کھڑا ہوا وہی روگ انتظار کا

امیر مینائی

۔۔۔۔۔
گزرنے ہی نہ دی وہ رات میں نے
گھڑی پر رکھ دیا تھا ہاتھ میں نے

شہزاد احمد

۔۔۔۔۔
ارمان وصل کا مری نظروں سے تاڑ کے
پہلے ہی سے وہ بیٹھ گئے منہ بگاڑ کے

لالہ مادھو رام جوہر

۔۔۔۔۔۔۔
تم کہاں وصل کہاں وصل کی امید کہاں
دل کے بہکانے کو اک بات بنا رکھی ہے

آغا شاعر قزلباش

۔۔۔۔۔۔۔
اس سے ملنے کی خوشی بعد میں دکھ دیتی ہے
جشن کے بعد کا سناٹا بہت کھلتا ہے

معین شاداب

۔۔۔۔۔۔
کبھی موج خواب میں کھو گیا کبھی تھک کے ریت پہ سو گیا
یوں ہی عمر ساری گزار دی فقط آرزوئے وصال میں

اسعد بدایونی

 
۔۔۔۔۔
ملنے کی یہ کون گھڑی تھی
باہر ہجر کی رات کھڑی تھی

احمد مشتاق

۔۔۔۔۔
دوست دل رکھنے کو کرتے ہیں بہانے کیا کیا
روز جھوٹی خبر وصل سنا جاتے ہیں

لالہ مادھو رام جوہر
۔۔۔۔۔۔
رکھ نہ آنسو سے وصل کی امید
کھارے پانی سے دال گلتی نہیں

شیخ قدرت اللہ قدرت

۔۔۔۔۔۔۔
آنکھیں بتا رہی ہیں کہ جاگے ہو رات کو
ان ساغروں میں بوئے شراب وصال ہے

جلیل مانک پوری

 
۔۔۔۔۔۔
جب ذکر کیا میں نے کبھی وصل کا ان سے
وہ کہنے لگے پاک محبت ہے بڑی چیز

نوح ناروی

 
آپ تو منہ پھیر کر کہتے ہیں آنے کے لیے
وصل کا وعدہ ذرا آنکھیں ملا کر کیجیے

لالہ مادھو رام جوہر

۔۔۔۔۔۔
کہاں ہم کہاں وصل جاناں کی حسرتؔ
بہت ہے انہیں اک نظر دیکھ لینا

حسرتؔ موہانی

ترا وصل ہے مجھے بے خودی ترا ہجر ہے مجھے آگہی
ترا وصل مجھ کو فراق ہے ترا ہجر مجھ کو وصال ہے

جلال الدین اکبر

 
۔۔۔۔۔۔
شب وصل کی کیا کہوں داستاں
زباں تھک گئی گفتگو رہ گئی

داغؔ دہلوی

اک رات دل جلوں کو یہ عیش وصال دے
پھر چاہے آسمان جہنم میں ڈال دے

جلالؔ لکھنوی

وہ گلے سے لپٹ کے سوتے ہیں
آج کل گرمیاں ہیں جاڑوں میں

مضطر خیرآبادی

۔۔۔۔۔۔۔
میں سمجھتا ہوں کہ ہے جنت و دوزخ کیا چیز
ایک ہے وصل ترا ایک ہے فرقت تیری

جلیل مانک پوری

۔۔۔۔۔۔
وصل ہو جائے یہیں حشر میں کیا رکھا ہے
آج کی بات کو کیوں کل پہ اٹھا رکھا ہے

امیر مینائی

کہاں کا وصل تنہائی نے شاید بھیس بدلا ہے
ترے دم بھر کے مل جانے کو ہم بھی کیا سمجھتے ہیں

فراق گورکھپوری

 
۔۔۔۔۔۔۔
خیر سے دل کو تری یاد سے کچھ کام تو ہے
وصل کی شب نہ سہی ہجر کا ہنگام تو ہے

حسن نعیم

  ۔۔۔۔۔۔۔
وصل کی بنتی ہیں ان باتوں سے تدبیریں کہیں
آرزوؤں سے پھرا کرتی ہیں تقدیریں کہیں

حسرتؔ موہانی

 
۔۔۔۔۔۔۔
دیکھ لے بلبل و پروانہ کی بیتابی کو
ہجر اچھا نہ حسینوں کا وصال اچھا ہے

امیر مینائی