سبو پر ، جام پر ، شیشے پہ ، پیمانے پہ ، کیا گزری

سبُو پر ، جام پر ، شیشے پہ ، پیمانے پہ ، کیا گزری

 نہ جانے میں نے توبہ کی ، تو میخانے پہ کیا گزری

ملیں ! تو فائزانِ منزلِ مقصود سے پوچھو

 گزر گاہِ محبت سے ،گزر جانے پہ کیا گزری

کسی کو میرے کاشانے سے ہمدردی نہیں شاید ! 

 ہر اک یہ پوچھے ہے ، میرے کاشانے پہ کیا گزری

نہ پوجو زندگی انجام ، وہ وجدانِ ناقص ہے

 حضور شمع بعد وجد پروانے پہ کیا گزری

تو اپنے ہی مالِ سوزِ غم پر غور کر پہلے 

 تجھے اِس سے نہیں کچھ بحث ، پروانے پہ کیا گزری

بتائیں برہمن اور شیخ ، اِن کی خانہ جنگی میں

 خدا خانے پہ کیا بیتی ، صنم خانے پہ کیا گزری

کسی حِکمت سے کر دے کوئی گویا مرنے والوں کو 

 یہ راز اب تک ہے سر بستہ ، کہ مر جانے پہ کیا گزری

تیری ہر سُو تجلی اور میر ی ہر طرف نظریں

 تجھے تو یاد ہوگا آیئنہ خانے پہ کیا گزری

زباں منہ میں ہے ، عرضِ حال کر ،تو نے تو دیکھا ہے 

 کہ خوئے ضبطِ و خاموشی سے ، پروانے پہ کیا گزری

وہ کہتا تھا ،خدا جانے ،بہار آئے ،تو کیا گزرے

 خدا جانے ، بہار آئی ، تو دِیوانے پہ کیا گزری

یہ ہے سیماب اک نا گفتہ بہ افسانہ کیا کہیے 

 وطن سے کنج غربت میں چلے آنے پہ کیا گزری

سیماب اکبر آبادی