مت آتش غفلت سوں مرے دل کوں جلا جا

مت آتش غفلت سوں مرے دل کوں جلا جا
مشتاق دَرَس کا ہوں ٹک یک دَرَس دکھا جا

 بے رحم نہ ہو، غصّہ نہ کر، بات مری سُن
ڈرتا نئیں، یک بات کی سو بات سُنا جا
جلتا ہوں میں مدّت ستی اے حسن کے دریا
ٹک مکھ کوں دکھا، آگ مرے دل کی بجھا جا
خواہش ہے مجھے وِرد کے پڑھنے کی ہمیشہ
یک بار کسو طرز سوں ٹک اسم بتا جا
جب اس کی طرف جاتا ہوں کر قصد تماشا
کہتا ہے مجھے خوف رقیباں سوں کہ جا جا
میں بوسہ کیا لب سوں پری رو کے طلب جیوں
غصّے ستی بولیا کہ چلا جا بے چلا جا
مدت سوں ولیؔ جھانج میں ہے ہات سوں دل کے
تو بھی اے جگر آہ کی نوبت کوں بجا جا
ولی دکنی