موج در موج کناروں کو سزا ملتی ہے
موج در موج کناروں کو سزا ملتی ہے
کوئی ڈوبے تو سہاروں کو سزا ملتی ہے
میکدے سے جو نکلتا ہے کوئی بے نشہ
چشمِ ساقی کے اشاروں کو سزا ملتی ہے
آپ کی زلفِ پریشاں کا تصور توبہ
نکہت و نور کے دھاروں کو سزا ملتی ہے
جب وہ دانتوں میں دباتے ہیں گلابی آنچل
کتنے پُر کیف نظاروں کو سزا ملتی ہے
میرے پیمانے میں ڈھل جاتا ہے پھولوں کا ثبات
میرے ساغرؔ میں بہاروں کو سزا ملتی ہے
(ساغر صدیقی)
Comments
Post a Comment