اس طرح چھیڑئے افسانۂ ہِجراں کوئی

اس طرح چھیڑئے افسانۂ ہجراں کوئی
آج ثابت نظر آئے نہ گریباں کوئی
خِرمنِ گل سے لپٹ کر وہیں مر جانا تھا
اب کرے کیوں گلۂ تنگئی داماں کوئی
دل میں اِک بُوند لہو کی نہیں، رونا کیسا
اب ٹپکتا نہیں آنکھوں سے گلستاں کوئی
لطف ہر طرح کا ہے دشتِ جنوں میں لیکن
پھاڑنے کو نہیں ملتا ہے گریباں کوئی 

 کیا مِرے حال پہ سچ مچ انہیں غم تھا قاصد
تو نے دیکھا تھا ستارہ سرِ مژگاں کوئی

اصغر گونڈوی