ہجر تیرا جے پانی منگے میں کُھوہ نیناں دے گیڑاں
ہجر تیرا جے پانی منگے میں کُھوہ نیناں دے گیڑاں
دل چاہندائے تینوں سامنے بٹھا کے درد پرانے چھیڑاں
یار جنہاں دے وچھڑ جاون اوہ کیوں روون تھوڑا
ہر شے نالوں ظالم یارو جس دا نام وچھوڑا
جیتن جیتن ہر کوئی کھیڈے تُوں ہارن کھیڈ فقیرا
جیتن دا مُل کوڈی پیندا ہارن دا مُل ہیرا
سب سیّاں رل پانی نوں ٹُریاں تے کوئی کوئی مُڑسی بھر کے
جنہاں نے بھر کے سر تے دھریا اوہ پیر رکھن ڈر ڈر کے
خسخس جتنی قدر نہ میری تے صاحب نوں وڈیائیاں
میں گلیاں دا رُوڑا کُوڑا محل چڑھایا سسائیاں
رحمت دا دریا الٰہی ہر دم وگدا تیرا
ہک قطرہ جے بخشیں مینوں کم بن جاندا میرا
بیلی بیلی ہر کوئی آکھے تے میں وی آکھاں بیلی
اس ویلے دا کوئی نہ بیلی جدوں نکلے جان اکیلی
ربا، توں بیلی تے سب جگ بیلی ان بیلی وی بیلی
سجناں باہجھ محمد بخشا سُنجی پئی حویلی
میاں محمد بخش
Comments
Post a Comment