ہونا ہے مری آنکھ کو نم ناک ابھی تو

ہونا ہے مری آنکھ کو نم ناک ابھی تو
کرنا ہے کسی غم میں یہ دل چاک ابھی تو
کرنی ہے کسی چشم فسوں ساز کی خواہش
پھرنا ہے کسی دشت میں غم ناک ابھی تو
کچھ اور بھی منظر ہیں پس منظر ہستی
کچھ اور جہاں ہیں سر افلاک ابھی تو
شاید ابھی اک اور جہاں ہونا ہے تخلیق
باقی ہیں گل و رنگ سر چاک ابھی تو
چمکے گا کہیں بام تمنا پہ کسی روز
یہ دل،یہ ستارہ ہے سر خاک ابھی تو
یہ زیست ابھی شوق و طلب سے نہیں واقف
اس بحر کو ہونا ہے غضب ناک ابھی تو
آخر کو پہنچنا ہے کسی دشت جنوں میں
در پیش ہے اک منزل ادراک ابھی تو
ضیا الحسن