بات کرنے سے قبیلے پتہ چلتا ہے

دوستو   عِشق  میں  قِبلے  کا  پتہ  چلتا  ہے
قُطبی  تارا  ہو  تو   رستے  کا  پتہ  چلتا  ہے

کیا دُکھوں کی میں تِرے سامنے گٹھڑی کھولوں
آنکھ  والے   تُجھے  چہرے  کا  پتہ  چلتا  ہے

کِس طرح دُنیا سے میں پیار چُھپا لُوں تیرا
جب  بہار  آئے  تو  سبزے  کا  پتہ  چلتا   ہے

دَسترس رکھتے ہو  تُم  عِلمِ ریاضی پہ بہت
کیا  تُمہیں  پانچ کے  ہِندسے کا  پتہ چلتا ہے

میں نہیں مانتا  کاغذ پہ لِکھا شجرہء نسب
بات   کرنے  سے   قبیلے   کا   پتہ   چلتا   ہے

سب سے اچھی ہے محمود یہ ادب کی دُنیا
زندگانی   کے   سلیقے   کا  ,   پتہ   چلتا   ہے

محمد محمود احمد