مزدور کی عید

مزدور کی عید !!!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چار جوڑے کپڑوں کے ، چار جوڑے جوتوں کے

تھوڑی چینی تھیلی میں ، ایک پیکٹ کھیر کا

ایک ڈبہ دودھ کا !!!!

دس یا بیس والی ہو ، ایک گڈی نوٹوں کی

کُل مِلا کے بتلاؤ ، کتنا وزن بنتا ہے

ہلکے پھلکے تھیلے میں ، ڈال دو تو آ جائے !!

چھوٹے موٹے خرچوں کو ، آگے پیچھے کر کے بھی

تھیلا چار چیزوں کا ، مجھ سے بھر نہیں پاتا

عید جیسے ہوتی ہے ، ویسے کر نہیں پاتا

روز جو اٹھاتا ہوں ، بوجھ وہ ٹنوں میں ہے

تھیلا چار چیزوں کا ، میں اٹھا نہیں پاتا

اِسی لیے تو کہتا ہوں ، کج نصیب لوگوں کے

غم تو ہلکے ہوتے ہیں ، خوشیاں بھاری ہوتی ہیں

خوشیاں بھاری ہوتی ہیں

عابی مکھنوی