یک بہ یک تبدیل رنگ آسماں کیسے ہوا

یک بہ یک تبدیل رنگِ آسماں کیسے ہوا
اس جگہ دیوارِ گلشن تھی، دھواں کیسے ہوا

شب سراے آب و گِل میں دیکھتے ہی دیکھتے
آدمِ خاکی اسیرِ امتحاں کیسے ہوا

چل رہی ہے دشت و در میں واقعی بادِ مراد
آج پھر وہ شوخ تجھ پر مہرباں کیسے ہوا

پوچھ ہی لیجے خروشِ شامِ ابر و باد سے
منہدم آخر یہ پتھر کا مکاں کیسے ہوا

ابتداے فصلِ گُل تھی اور وہ تھا بام پر
کیا کہیں اس کھیل میں دل کا زیاں کیسے ہوا

ثروت حسین