اِک تھاں بیتے سمے سُہانےچیتے کر کر روندے نیں
اِک تھاں بیتے سمے سُہانےچیتے کر کر روندے نیں
اج وی بابے پِنڈ پُرانے چیتے چیتے کر کر روندے نیں
مِسّی روٹی،گُڑ دے چاول،ساگ سرہوں دیاں گندلاں دا
دیسی گھیو دے دیسی کھانے چیتے کر کر روندے نیں
ایدھر اودھر جد کدی وی کلے بیٹھے ہوو ن تے
خورے کیہ کیہ اللہ جانے چیتے کر کر روندے نیں
میں تکیا اے کِنی واری جِسلے ڈیگر ہوندی اے
کُٹیا گُڑ تے بُجھے دانے چیتے کر کر روندے نیں
کنک وڈھیندی،روں چُگیندی،تھاں تھاں وگدے کُھوہاں نوں
کیہ کیہ دساں کِنج نمانے چیتے کر کر روندے نیں
پِڑ چُکیجن ویلے جو جو ٹوپے ویچ کے لیندے سی
ٹانگر،گچکاں، کھنڈ مکھانے چیتے کر کر روندے نیں
شِکر دُپہریں لمے لمے سُوٹے لاکے حُقیاں دے
بوڑھاں تھلے رنگ جمانے چیتے چیتے کر کر روندے نیں
ساری عمراں سندھو کھادے بہ بہ سانجھے بنیاں تے
رینڈی،پُھٹاں،لال دوہانے چیتے کر کر روندے نیں
ارشاد سندھو
Comments
Post a Comment