پھر اس کے بعد وہ روٹھا رہا نہیں مانا

پھر اس کے بعد وہ روٹھا رہا نہیں مانا

بس ایک بار ہی ، دل کا کہا ، نہیں مانا

 تو اُس کی ذات کو کیا فرق پڑنے والا ہے ؟

اگر کسی نے خدا کو خدا نہیں مانا

میں صبر و ضبط کی اچھی مثال ہوں ، میں نے

بُروں کی بات کا اکثر برا نہیں مانا

یہ جنگ ختم ہوجاتی مصالحت کے طفیل

ہوا تو مان بھی جاتی ، دِیا نہیں مانا

مجھے بھی جانتے تھے لوگ ، اس کی فطرت بھی

سو جس کسی نے بھی قصہ سُنا ، نہیں مانا

میں تجھ سے مانگ تو لیتی تری محبت پر

یقین کر مرا دستِ انا نہیں مانا

کومل جوئیہ