حُسن جاناں کی تعریف ممکن نہیں

حسن جاناں کی تعریف ممکن نہیں 

آفریں آفریں، آفریں آفریں

تو بھی دیکھے اگر تو کہے ھمنشین

آفریں آفریں، آفریں آفریں

ایسا دیکھا نہیں خوبصورت کوئی 

جسم، جیسے اجنتا کی مورت کوئی 

جسم، جیسے نگاھوں پہ جادو کوئی

جسم نغمہ کوئی، جسم خوشبو کوئی 

جسم، جیسے مچلتی ھوئی راگنی

جسم، جیسے مہکتی ھوئی چاندنی

جسم، جیسے کہ کھلتا ھوا اک چمن

جسم، جیسے کہ سورج کی پہلی کرن

جسم ترشا ھوا، دلکش و دلنشیں

صندلیں صندلیں۔۔ مرمریں مرمریں

چہرہ اک پھول کی طرح شاداب ھے

چہرہ اس کا ھے یا کوئی مہتاب ھے

چہرہ جیسے غزل، چہرہ جان غزل

چہرہ جیسے کلی، چہرہ جیسے کنول

چہرہ جیسے تصور بھی، تصویر بھی 

چہرہ ایک خواب بھی، چہرہ تعبیر بھی

چہرہ کوئی الف لیلوی داستاں

چہرہ اک پل یقین، چہرہ اک پل گماں

چہرہ جیسا کہ چہرہ کہیں بھی نہیں

ماہ رو ماہ رو، مہ جبیں مہ جبیں

آنکھیں دیکھیں تو میں دیکھتا رہ گیا

جام دو اور دونوں ہی دو آتشہ

آنکھیں یا میکدے کے یہ دو باب ہیں

آنکھیں انکو کہوں یا کہوں خواب ہیں

آنکھیں نیچی ھوئیں تو حیا بن گئیں

آنکھیں اونچی ھوئیں تو دعا بن گئیں

آنکھیں اٹھ کر جھکیں تو دعا بن گئیں

آنکھیں*جھک کر اٹھیں تو قضا بن گئیں

آنکھیں جن میں ھے قید آسمان و زمیں

نرگسی نرگسی، سرمگیں سرمگیں

زلف جاناں کی بھی لمبی ھے داستاں

زلف کی میرے دل پر ہیں پرچھائیاں

زلف جیسے کہ امڈی ھوئی ھو گھٹا

زلف جیسے کہ ھو کوئی کالی بلا

زلف الجھے تو دنیا پریشان ھو

زلف سلجھے تو یہ زیست آسان ھو

زلف بکھرے سیہ رات چھانے لگے

زلف لہرائے تو رات گانے لگے

زلف زنجیر ھے پھر بھی کتنی حسیں

ریشمیں ریشمیں، عنبریں عنبریں

جاوید اختر