لفظ پر پرندے شاعری ، پرندوں پر اشعار

ایک اک کر کے پرندوں نے تو ہجرت کر لی
پیڑ ہوں پیڑ تو ہجرت بھی نہیں کر سکتا
اشرف یوسفی
۔۔۔۔۔
تم پرندوں سے زیادہ تو نہیں ہو آزاد
شام ہونے کو ہے اب گھر کی طرف لوٹ چلو

عرفان صدیقی

۔۔۔۔۔۔۔
مجھے معلوم ہے اس کا ٹھکانا پھر کہاں ہوگا
پرندہ آسماں چھونے میں جب ناکام ہو جائے

بشیر بدر
۔۔۔۔۔
دشت میں پیاس بجھاتے ہوئے مر جاتے ہیں
ہم پرندے کہیں جاتے ہوئے  مر جاتے ہیں
عباس تابش
۔۔۔۔۔

دیکھ کر انسان کی بیچارگی
شام سے پہلے پرندے سو گئے
عفت زریں
۔۔۔۔۔
مرے حالات کو بس یوں سمجھ لو
پرندے پر شجر رکھا ہوا ہے
شجاع خاور
۔۔۔۔۔
کتاب زندگی کی یہ مقدس آیتیں ہیں
ہرن چیتل چکارے تتلیاں جگنو پرندے
ظفر خان نیازی
۔۔۔۔۔
بیٹھے تھے جب تو سارے پرندے تھے ساتھ ساتھ
اڑتے ہی شاخ سے کئی سمتوں میں بٹ گئے
ساغرؔ اعظمی
۔۔۔۔۔۔
کچھ احتیاط پرندے بھی رکھنا بھول گئے
کچھ انتقام بھی آندھی نے بدترین لیے
نصرت گوالیاری
۔۔۔۔۔
ہم درختوں کو کہاں آتا ہے ہجرت کرنا
تم پرندے ہو  وطن چھوڑ کے جا سکتے ہو
عمار اقبال
۔۔۔۔
سب کے سو جانے پہ افلاک سے کیا کہتا ہے
رات کو ایک پرندے کی صدا سنتا ہوں
منموہن تلخ
۔۔۔۔
عجیب درد کا رشتہ تھا سب کے سب روئے
شجر گرا تو پرندے تمام شب روئے
طارق نعیم
۔۔۔۔۔
نیلی چھت پہ لا محدود پرندے تھے
آج کسی نے اشک بہا کر رقص کیا
محمد مستحسن جامی
۔۔۔۔
آشیانوں میں نہ جب لوٹے پرندے تو سدیدؔ
دور تک تکتی رہیں شاخوں میں آنکھیں صبح تک
انور سدید
۔۔۔۔۔۔
بس اک تم ہی نہیں منظر میں ورنہ کیا نہیں ہے
صراحی چاند تارے تتلیاں جگنو پرندے
ظفر خان نیازی
۔۔۔۔۔
تھکے ہارے پرندے جب بسیرے کے لیے لوٹیں
سلیقہ مند شاخوں کا لچک جانا ضروری ہے
وسیم بریلوی
۔۔۔۔۔
درختوں پر پرندے لوٹ آنا چاہتے ہیں
خزاں رت کا گزر جانا ضروری ہو گیا ہے
حیدر قریشی
۔۔۔۔۔
درخت کٹ گیا لیکن وہ رابطے ناصرؔ
تمام رات پرندے زمیں پہ بیٹھے رہے
حسن ناصر
۔۔۔۔۔
کل شجر کی گفتگو سنتے تھے اور حیرت میں تھے
اب پرندے بولتے ہیں اور شجر خاموش ہیں
اظہرنقوی
۔۔۔۔۔
اڑانوں نے کیا تھا اس قدر مایوس ان کو
تھکے ہارے پرندے جال میں خود پھنس رہے تھے
منیش شکلا
۔۔۔۔۔
نئے گھروں میں نہ روزن تھے اور نہ محرابیں
پرندے لوٹ گئے اپنے آشیاں لے کر
زبیر رضوی
۔۔۔۔۔
یہ پرندے بھی کھیتوں کے مزدور ہیں
لوٹ کے اپنے گھر شام تک جائیں گے
بشیر بدر
۔۔۔۔۔
ہوا کی زد میں پتے کی طرح تھا
وہ اک زخمی پرندے کی طرح تھا
سلیم شہزاد
۔۔۔۔۔
پرندہ جانب دانہ ہمیشہ اڑ کے آتا ہے
پرندے کی طرف اڑ کر کبھی دانہ نہیں آتا
عدیم ہاشمی
۔۔۔۔
رکھ لیے روزن زنداں پہ پرندے سارے
جو نہ واں رکھنے تھے دیوان میں رکھ چھوڑے ہیں
افضال نوید

۔۔۔۔۔۔
اب تو چپ چاپ شام آتی ہے
پہلے چڑیوں کے شور ہوتے تھے

محمد علوی

 
۔۔۔۔۔۔۔

نکال لایا ہوں ایک پنجرے سے اک پرندہ
اب اس پرندے کے دل سے پنجرہ نکالنا ہے

عمیر نجمی
۔۔۔۔۔۔
 
اک پرندہ ابھی اڑان میں ہے
تیر ہر شخص کی کمان میں ہے

امیر قزلباش

 
۔۔۔۔۔۔۔

یہ پرندے بھی کھیتوں کے مزدور ہیں
لوٹ کے اپنے گھر شام تک جائیں گے

بشیر بدر

  ۔۔۔۔۔۔
بچھڑ کے تجھ سے نہ دیکھا گیا کسی کا ملاپ
اڑا دیئے ہیں پرندے شجر پہ بیٹھے ہوئے

عدیم ہاشمی

۔۔۔۔۔۔۔۔

پرند شاخ پہ تنہا اداس بیٹھا ہے
اڑان بھول گیا مدتوں کی بندش میں

خلیل تنویر
۔۔۔۔۔۔۔
عجیب درد کا رشتہ تھا سب کے سب روئے
شجر گرا تو پرندے تمام شب روئے

طارق نعیم

 
۔۔۔۔۔۔۔

جانے کیا کیا ظلم پرندے دیکھ کے آتے ہیں
شام ڈھلے پیڑوں پر مرثیہ خوانی ہوتی ہے

افضل خان
۔۔۔۔۔۔۔۔
 
پرند اونچی اڑانوں کی دھن میں رہتا ہے
مگر زمیں کی حدوں میں بسر بھی کرتا ہے

خلیل تنویر
۔۔۔۔۔۔۔
 
کچھ احتیاط پرندے بھی رکھنا بھول گئے
کچھ انتقام بھی آندھی نے بدترین لیے

نصرت گوالیاری
۔۔۔۔۔
پرند کیوں مری شاخوں سے خوف کھاتے ہیں
کہ اک درخت ہوں اور سایہ دار میں بھی ہوں

اسعد بدایونی
۔۔۔۔۔۔
 
یہ رنگ رنگ پرندے ہی ہم سے اچھے ہیں
جو اک درخت پہ رہتے ہیں بیلیوں کی طرح

خاقان خاور
۔۔۔۔۔۔
 
پرندے دور فضاؤں میں کھو گئے علویؔ
اجاڑ اجاڑ درختوں پہ آشیانے تھے

محمد علوی

  ۔۔۔۔۔۔۔
پرند پیڑ سے پرواز کرتے جاتے ہیں
کہ بستیوں کا مقدر بدلتا جاتا ہے

اسعد بدایونی
۔۔۔۔۔۔۔
 
یہ طائروں کی قطاریں کدھر کو جاتی ہیں
نہ کوئی دام بچھا ہے کہیں نہ دانہ ہے

اسعد بدایونی

  ۔۔۔۔۔۔۔
جانے کیا سوچ کے پھر ان کو رہائی دے دی
ہم نے اب کے بھی پرندوں کو تہہ دام کیا

عنبر بہرائچی