میری راہوں میں کئی مرحلے دشوار آئے

میری راہوں میں کئی مرحلے دشوار آئے 

 دیر آیا حرم آیا رسن و دار آئے

جلوہ گاہوں میں ابھی شمع یقیں جلنے دو 

 کیا عجب ہے جو کوئی طالب دیدار آئے

محفل ناز کے آداب ہیں سب پر لازم 

 کوئی دیوانہ یہاں آئے کہ ہشیار آئے

عشق میں وسعت کونین سے شائستہ گزر 

 کیا خبر ہے کہ کہاں جلوہ گہہ یار آئے

ساز ہستی میں وہ سوز ابدی پیدا کر 

 دل کے ٹوٹے ہوئے تاروں سے بھی جھنکار آئے

موج و ساحل مہ و انجم گل و لالہ دیکھے 

 جب کہیں تجھ کو نہ پایا تو سر دار آئے

لذت درد نہیں سب کے مقدر میں قمرؔ 

 جس کے حصہ میں بھی یہ دولت بیدار آئے

قمرؔ مراد آبادی