کنول ملک کی شاعری
نہ سوچا تھا کہ یوں دیوار ہوگا
یہ رستہ اس قدر دشوار ہوگا
ابھرتی رہ تمنائے محبت
وہ منظر اب کہاں بیدرا ہوگا
لبِ دریائے وحشت دل کھڑا ھے
میری انگلی پکڑ کر پار ہوگا
کہانی بڑھ رہی ھے اس طرف اب
جہاں تنہا کہانی کار ہوگا
خرابی ھے یہی خواہش میں اپنی
اگر نکلی نہیں آزار ہوگا
سمجھتی تھی ترے بکنے سے پہلے
تیرا آخر کوئی معیار ہوگا
*********************************************
دل کے زخموں کو بھر بھی سکتی ہوں
جاں سے اپنی گزر بھی سکتی ہوں
چھوڑ یہ بام و در بھی سکتی ہوں
تیری خاطر ٹھہر بھی سکتی ہوں
تُو کہ چھتنار ہے محبت کا
تیری خاطر ٹھہر بھی سکتی ہوں
آخری سانس تک نبھاؤں گی
میں جو کہتی ہوں کر بھی سکتی ہوں
یہ جنوں ہے تری محبت کا
مار سکتی ہوں مر بھی سکتی ہوں
خواب اتنے عزیز ہیں مجھ کو
ان کا تاوان بھر بھی سکتی ہوں
آسمانوں کا فاصلہ کیا ہے
میں وہاں پاؤں دھر بھی سکتی ہوں
میں ترے مہربان چشمے سے
اپنی چھاگل کو بھر بھی سکتی ہوں
اس لیے جا رہی ہوں میلے میں
اُس نظر سے گزر بھی سکتی ہوں
اے تخیل! تری ہتھیلی پر
دیکھ شمس و قمر بھی سکتی ہوں
وہ اگر پیار سے کہے تو کنولؔ
خود کو تبدیل کر بھی سکتی ہوں
*********************************************
مرا بچھڑا رانجھن موڑ سجن!
مجھے چاہ نہ کوئی اور سجن!
میں نے اوڑھا رنگ سیاہ فقط
دیئے کنگن ، چوڑی توڑ سجن!
میں نے تجھ سے سچا عشق کیا
دی ساری دنیا چھوڑ سجن!
تری یاد سے باھر نکلوں میں
مجھے آکر یوں جنجھوڑ سجن!
میں ہر درگاہ پہ جاؤنگی
وہ سندھ ہو یا لاھور سجن!
کوئی دھاگہ تجھ سے جوڑے تو
منت کی باندھوں ڈور سجن!
چل مجھ سے عشق دوبارہ کر
چل پھر سے ناتا جوڑ سجن!
چل نام نہ دے، اک شام ہی دے!
مری بات پہ کر کچھ غور سجن!
تو نے مانگا ہجر، جدائی بس!
کچھ مانگ کے تکتا اور سجن!
مرا جرم محبت ھے سائیں!
کر زندہ ہی درگور سجن!
تری دید مرا حجِ اکبر
ترا نام پڑھوں ہر پور سجن!
تجھے میری بات کا مان نہیں
جا رہنے دے! بس چھوڑ سجن!
کیوں ہرجائی کو یاد کرے
چل چھوڑ کنول! بس چھوڑ سجن!
*********************************************
تمہیں پانے کی چاہت ھے مگر کھونے کا ڈر بھی ھے
کہ دل شہر ِتمنا ھے تو محرومی کا گھر بھی ھے
وفا کے باغ میں جھولے پڑے ہیں آرزوؤں کے
دعاؤں کی ہری بیلوں پہ خواہش کا ثمر بھی ھے
مسافت نا امیدی کی پڑی ھے پاؤں میں میرے
تمہاری ہمرہی بھی ھے مگر تنہا سفر بھی ھے
فصیلِ فکر پہ یادوں کی اک قندیل روشن ھے
تمہاری منتظر میں ہی نہیں یہ چشمِ تر بھی ھے
چمکتی کانچ جیسی دھڑکنوں کو توڑنے والا
وہ پتھر دل بہت مانا ہوا اک شیشہ گر بھی ھے
ہماری ایک خامی ھے تمہاری ذات میں کھونا
تمہیں تم سے چرا لینا ہمارا اک ہنر بھی ھے
سنو! تم کہہ رہے تھے ناں دعا میں مانگ لو مجھکو
مگر تم سوچ لو مری دعاؤں میں اثر بھی ھے
کبھی تم چاند سے کہنا مرے آنگن میں بھی اترے
سڑک کے پار کچے راستے پر میرا گھر بھی ھے
کنول اعزاز بھی کہتی ھے اس کو جرم بھی دنیا
کہ بدنامِ زمانہ بھی، محبت معتبر بھی ھے
۔۔
ابھی نہیں کبھی پھر تجھ سے رابطہ کرونگی
میں اپنے آپ سے کچھ روز مشورہ کرونگی
بھٹک رہی ہوں تو اس میں بھی میری مرضی ھے
ترے فریب سے نکلوں گی راستہ کرونگی
نصیب اپنا جگاتے ہیں جاگنے والے
میں تیری یاد مناؤں گی رتجگہ کرونگی
تجھے گنواؤں گی لیکن میں مسکرا کر دوست
میں اب کہ ٹوٹ بھی جاوں تو حوصلہ کرونگی
کنول جدائی نے پتھرا دیا ھے آنکھوں کو
میں کوئی خواب تراشوں گی آئینہ کرونگی
کنول ملک
Comments
Post a Comment