اے دشت احترام ! یہاں دل سے آئے ہیں

اے دشت احترام ! یہاں دل سے آئے ہیں

 ہم تجھ میں بود و باش کو ساحل سے آۓ ہیں

ہم کو رہِ حصول دکھانا فضول ہے

 ہم تو حضور قریہ ء حاصل سے آئے ہیں

افلاک سے منہ پھیرنا آسان مت سمجھ

 اے خاک ، تیرے رو برو مشکل سے آئے ہیں

رستے کے بھید جانیے تو ہم سے جانیے

 ہم جو پلٹ کے آخری منزل سے آئے ہیں

اس بار خوں نہ روئیے ، دامن نہ پھاڑئيے

 اس بار پھول کوچۂ قاتل سے آئے ہیں

اک بار پاؤں دھرنے دے اپنی زمین پر

 ہم تیرے پاس دور کے ساحل سے آئے ہیں

( شہزاد نير)