بصورت غم نو ،عرصہءملال میں آ

بصورت غم نو ،عرصہء ملال میں آ

 مکین وہم ! کبھی قریہء سوال میں آ

یہ کم شعور تجھے یوں سمجھ نہ پائیں گے

 جو استعارہ نہیں تو کسی مثال میں آ

یہ زود خرچی کہیں آنکھ کا زیاں تو نہیں

 مدام بہتے ہوئے بحر ! اعتدال میں آ

تُو مجھ سے کیوں نہیں کہتا کہ خود کو مت چاہو ں

 خموش کس لیے بیٹھا ہے ، اشتعال میں آ

یقین کر مَیں خوشی سے تجھے گزاروں گا

 گزشتہ وقت ! بس اک بار عہدِِ حال میں آ

پکارتا ہے کوئی جسم آج بھی شارقؔ

 بھٹکتی روح ! کبھی میرے خدّوخال میں آ

(سعید شارق)