دیر و حرم سے گزرے اب دل ہے گھر ہمارا

دَیر و حَرم سے گُزرے، اب دل ہے گھر ہمارا

ہے ختم اس آبلے پر سیر و سفر ہمارا

 دُنیا و دِیں کی جانب میلان ہو تو کہئے

کیا جانئے کہ اُس بِن دل ہے کدھر ہمارا

ہیں تیرے آئینے کی تمثال ہم نہ پوچھو

اس دشت میں نہیں ہے پیدا اثر ہمارا

جُوں صُبح اب کہاں ہے طُولِ سُخن کی فُرصت

قصہ ہی کوئی دَم کو ہے مُختصر ہمارا

کُوچے میں اُس کے جا کر بنتا نہیں پھر آنا

خوُن ایک دن گریگا اس خاک پر ہمارا

سیلاب ہر طرف سے آئیں گے بادیہ میں

جُوں اَبر روتے ہو گا جس دَم گُزر ہمارا

نشوونما ہے اپنی جُوں گَردباد انوکھی

بالیدہ خاکِ رہ سے ہے یہ شجر ہمارا

یُوں دُور سے کھڑے ہو کیا مُعتبر ہے رونا

دامن سے باندھ دامن اے اَبرِ تر ہمارا

اِس کارواں سَرا میں کیا میرؔ بار کھولیں

یھاں کُوچ لگ رہا ہے شام و سَحر ہمارا

میر تقی میر