ہر چند بستہ چشم رہا بستہ لب رہا​

ہر چند بستہ چشم رہا بستہ لب رہا​
میں مدتوں نشانۂ تیرِ غضب رہا​
غیروں پہ لطف کا بھی بتایا گیا جواز​
مجھ پر ترا ستم بھی مگر بے سبب رہا​
تو نے جو کچھ دیا وہ دیا لطفِ خاص سے​
پابندِ آستیں مِرا دستِ طلب رہا​
اس بزم میں‌ نگاہ پہ قابو نہ رکھ سکا​
ہاں مجھ کو اعتراف ہے میں ‌بے ادب رہا​
سو بار تیرے غم نے دکھائی رہِ فنا​
سو بار تیری یاد میں، میں جاں بلب رہا​
دل کی فسردگی نے یہ مجھ پر ستم کیا​
میں وقفِ انتظارِ اجل روز و شب رہا​
فطرت رموز شوق نہ کہہ، گریہ کوش رہا
”سب کچھ کہا اسی نے جو یاں بستہ لب رہا“

عبدالعزیز فطرت