دور جہالت سے رہتا ہے نام مُحمّد والوں کا

دُور جہالت سے رہتا ہے نام مُحمّدﷺ والوں کا
مُلّاؤں سے بہتر ہے اسلام مُحمّدﷺ والوں کا !
ہم تخریب نہیں کرتے ہیں، امن ہمارا شیوہ ہے
مِیم محبّت والا ہے پیغام مُحمّدﷺ والوں کا
انسانوں سے پیار ہے اِن کو، نفرت سے بیزاری ہے
ہَوکا دیتا جاتا ہوں ہر گام ! مُحمّدﷺ والوں کا
کسی سیاست سے کیا لینا دینا اِن متوالوں کو
ہر دم یادِ یار میں رہنا کام مُحمّدﷺ والوں کا
بعد از عصر دُرودِ تاج کی خوشبو پھیلتی جاتی ہے
میلہ سا لگ جاتا ہے ہر شام ! مُحمّدﷺ والوں کا
ہاں میں علی زریون کہ ہوں مجنون محبت مستی سے
میں نوکر میں بندہ ہوں بے دام ! مُحمّدﷺ والوں کا !
علی زریون